Urdu blog for the month of May

                                                   
                                                                                                                                                      "قفس"
                                                                 'کاغذی ہے پیرہن ہر پیکرِ تصویر کا'
اس کاغذی پیرہن میں روح پھونک کر خدا نے دنیا میں اسے اپنا نائب مقرر کیا۔ اسے عقل دی، فہم دیا، خیال دیا، گمان دیا۔ اسے اشرف المخلوقات قرار دے کر آزاد چھوڑ دیا۔ تو جو اس کو نہ پا سکا وہ گویا بھٹک گیا، اس نے آخرت کی ابدیت کو چھوڑ کر دنیا کی سیج کو ترجیح دی اور  جس نے اس کی تجلی کو پا لیا اس کی نظر میں خلعتِ سلطانی کی بھی اہمیت نہ رہی۔
دنیا مومن کا قفس ہے۔۔۔۔ایک ایسا قفس جس کی چار دیواری خالقِ ارض و سما کی محبت سے تعمیر کی جاتی ہے۔مومن رہتا تو اس چار دیواری کے اندر ہے لیکن اپنے من کی دنیا کے اندر کھو کر لامکاں کی وسعتوں کے پار دیکھتا ہے۔اس کی جبیں ہر وقت حقیقت منتظر کے آگے سر نگوں رہتی ہے۔ یہ مقام بھی ہر ایک کو حاصل نہیں۔۔۔بس وہ اپنے خاص بندوں کو چُن لیتا ہے جوالفت، محبت، عقیدت اور عشق سے بھی کہیں آگے نکل کر اپنے مالک سے ایسی لو لگا لیتے ہیں کہ یہ دنیا ان کے لیے قید خانہ اور مالک سے ملاقات ان کی چاہ بن جاتی ہے
دنیا کی لذتوں کے پیچھے مارے مارے پھرنے والے کیا جانیں کہ رات کے پچھلے پہر جب ساری کائنات سو رہی ہو تب مالک کے آگے گڑگڑانے میں کیا لذت ہے۔۔جب سوچا جائے کہ ہمیں بنانے والا کس قدر رحیم ہے،
جس کی ذات ساری کائنات کو گھیرے ہوئے ہے۔
جس نے یہ زمین جو نجانے کتنی مخلوقات کا بوجھ اُٹھائے ہوئے ہے اور وہ بغیر ستونوں والا آسمان بنائے،
، وہ جو درختوں پر لگے ایک ایک پتے کا حساب رکھتا ہے
وہ جس کے حکم سے دریا کی موجوں میں دم ہے
وہ جس کی تسبیح دنیا کی بڑی سے بڑی سے لے کر چھوٹی سے چھوٹی مخلوق بھی کرتی ہے۔۔۔۔۔
خود کو اس مالک کے آگے جھکا دینے میں کتنی لذت ہے اور یہ لذت اسی کو نصیب ہوتی ہے جو اس قفس کی حقیقت کو پا لے۔ ایسےمومن کے لیے دنیا کا یہ قفس ہی اس کی جنت ہے اور آ خرت کی جنت کے تو کیا ہی کہنے جو ہر وقت اس کی منتظر ہے۔۔۔۔
                                                                             ایمن ربانی
                                                                            سیکنڈ ائیر