Urdu blog for the month of August

                                                            

                                                                   کورونا وائرس کی آپ بیتی                

                                                                                                                                                      (باقی دنیا)                                                                   

مجھے بچپن سے ہی بہت شوق تھا کہ میں پوری دنیا کی سیر کروں اور جہاں جاؤں بس میرا ہی چرچا ہو ۔ 

میں نے اپنی آنکھ جانوروں میں کھولی. اب میرا مقصد کسی طرح انسانوں تک پہنچنا تھا کیونکہ انکے علاوہ کوئی مجھے میرے خوابوں کی تکمیل تک نہیں پہنچا سکتا تھا. میرا بہترین ہدف چائنہ کی عوام رہی. بس جیسے ہی میں نے ہوش سنبھالا  میں چمگادڑ اور اسی جیسے باقی جانوروں میں جا بسا اور جب انسانوں نے ایسے جانور اپنے پیٹ میں اتارے تو میں بھی ان کے اندر پہنچ گیا.  یوں میرا پہلا مقصد پورا ہوا۔۔ ہی ہی ہی ہی۔۔

 شہر ووہان میں تباہی مچ گئی اور ہر جگہ میرا ہی چرچا ہونے لگا ۔ میرے خواب بڑے تھے تو اب اپنا اگلا نشانہ وہاں آۓ سیاحوں کو بنایا اب ان کے بیگوں، ہاتھوں، کپڑوں، ‏ غرض ہر چیز کے ساتھ چمٹنا ہی میرا مقصد تھا۔ میرے ساتھی بھی میرا خوب ساتھ دیتے رہے اور ہم انسانوں میں ناچتے، گاتے،  اڑتے جسموں میں تباہی مچاتے چلے گئے ۔ میں نے سب کو ماسک پہنا دیا. چائنہ کی عوام مجھ سے جب خوف کھاتی تو میں اپنے جنگجؤوں کے ساتھ بل بتوڑی کی شکل بنا کے ہنستا۔ 

اب میں چائنہ سے نکل کر امریکہ، اٹلی، برازیل جیسی بڑی بڑی طاقتوں تک بھی پہنچ گیا۔ میں نے لوگوں کے پھیپھڑوں کا حشر نشر کر دیا ۔ کھانسی، زکام، بخار اور درد؛ اس سب سے اپنے شکاروں کی تواضع کی ۔ میرے شکار کسی سے ہاتھ ملاتے یا  گلے ملتے تو دوسرے کو بھی شکار بنا لیتے اور اس طرح پوری دنیا میں لاکھوں لوگوں کو میں نے اپنے حصار میں لے لیا. سب مجھ سے نپٹنے کیلۓ ادویات بنانے لگے. مجھ پہ جیسے ہی کسی دوا کا اثر ہونے لگتا میں بھیس بدل لیتا۔ مجھ سے بس وہی بچا جو مجھ سے خوف نہ کھاتا تھا اور جس کی قوتِ مدافعت قدرے بہتر تھی۔ ہسپتال میرے شکاریوں سے بھر گئے۔دنیا کے سینکڑوں ملکوں میں تہلکہ مچاتا ہوا میں اب پاکستان پہنچا ۔ 

                                                                                                                                                  (پاکستان)                                                                      

 پہلے پہل تو یہ سب مجھے دیکھتے ہی تتر بتر ہو گئے ۔ مجھے آج بھی یاد ہے 26 فروری کا وہ دن جب انہوں نے مجھے پہلی بار دیکھا ۔ اس کے بعد میری وحشت کے خوف سے یہاں کے لوگ اذانیں دینے لگے اور ہر بڑھتے کیس سے خوف زدہ ہوتےچلے گئے۔ ایسا معاملہ کچھ عرصہ چلتا رہا ۔ میں اپنی مستی میں تھا کہ اچانک پاکستانی عوام کا رویہ میری جانب یکسر بدل گیا۔

 کچھ واقعات سناۓ دیتا ہوں ۔ میں بس سٹاپ پہ کھڑا اپنا بھر پور وار کرنے کو تیار تھا. جب میں نے بس دیکھی تو خوشی سے دانت بھینچے.  دروازہ کھلا اور میرا منہ کھلے کا کھلا رہ گیا ۔ کیا دیکھتا ہوں کہ سب ایک دوسرے پہ چڑھے بیٹھے ہیں اور میرے لیۓ کوئی جگہ ہی نہیں. مجھے ایسا لگا کسی نے میرے منہ پہ زور  کا تھپڑ مارا ہو. باقی دنیا میں میرا نام کافی تھا اور یہ لوگ۔۔۔۔۔۔ توبہ ۔۔ میں بلڈوزر جیسا منہ لیےخاموشی سے ساتھ والی گلی میں چلنے لگا۔ ایک گھر سے آوازیں آئیں. میری ہمت تھوڑی بڑھی کہ اب شکار کروں گا. لیکن کیا دیکھتا ہوں کہ سات بھائیوں کی دعوت ایک ہی گھر میں ہے۔

 ان کے دو سو بچے ایک ساتھ کھیل رہے ہیں.مزید زورکا تھپڑ کھا کر اب میں تھوڑا آگے گیا. پھر میں چلتا رہا، دیکھا کہ لوگ ڈاکٹروں کو مار رہے کہ رہے اور کہہ رہے ہیں کوئی کورونا نہیں ہے. مطلب میرے منہ پہ ہی مجھے جھوٹا کہہ دیا. میرا دل خون کے آنسو رونے لگا. 

تھوڑا اور آگے گیا. کچھ لوگ پیر بابوں سے پیاز دم کروا کے کھا رہے ہیں. اب میں خوش ہوا کیونکہ اب تھپڑ سائنسدانوں کو پڑا تھا ہاہاہاہا....وہ سارے پاگل پاکستان آ جائیں بھلا ! ایسے ہی مجھے مارنے کی دوا بنانے لگے ہوۓ ہو۔ یہاں آئیں پیاز کھائیں۔۔۔۔۔

پھر میں آگے آ گیا. مالز میں رش، سڑکوں پہ رش، جنازوں میں رش، مسیحاؤں کی پٹائی، زکام ہونے پہ سارے محلے کی سیر، کورونا ٹیسٹ پازیٹو آنے پہ پورے خاندان کی تیمارداری کیلۓ آمد، ہسپتالوں میں ڈاکٹرز پہ الزامات اور جھوٹے بہتان، دوستوں کا سڑکوں پہ میل جول اور مجھ سے مکمل بے خوفی کا عالم ۔۔۔۔ یہ سب دیکھنے کے بعد اب میں راوی کے پل پہ ٹانگیں لٹکاۓ بیٹھا ہوں. تھپڑ کھا کھا کر  اب  میں بےحال ہو چکا ہوں اور جلد خود کشی کرنے والا ہوں۔ تمام پاکستانی عوام سے کہنا چاہتا ہوں۔۔۔

 "میرا آخری پیغام۔۔۔۔ اچھا کھیل گۓ ہو یار" 

 تحریر از : ندا بنتِ اقبال

فورتھ ائیر